اقوام متحدہ، –
اقوام متحدہ کی سلامتی کونسل کے ہنگامی اجلاس میں عالمی جوہری توانائی ایجنسی کے ڈائریکٹر جنرل، رافیل ماریانو گروسی نے خبردار کیا کہ جوہری تنصیبات پر کوئی بھی فوجی حملہ ایران، خطے اور دنیا بھر کے لوگوں کے لیے سنگین نتائج پیدا کر سکتا ہے۔ انہوں نے کہا کہ اس قسم کی کارروائیاں اقوام متحدہ کے چارٹر اور بین الاقوامی قانون کی کھلی خلاف ورزی ہیں۔
IAEA کی جنرل کونسل نے بھی اس بات کی تصدیق کی کہ جوہری سہولیات پر کسی بھی قسم کا فوجی حملہ بین الاقوامی اصولوں کے منافی ہے اور اس سے عالمی امن و سلامتی کو شدید خطرات لاحق ہو سکتے ہیں۔
اس موقع پر ایران کے مستقل مندوب امیر سعید ایراوانی نے اسرائیل پر الزام عائد کیا کہ اس کا حملہ سفارتکاری کو ختم کرنے، مذاکرات کو سبوتاژ کرنے، اور پورے خطے کو ایک بڑے تنازع میں دھکیلنے کی سازش ہے۔
دوسری جانب، اسرائیل کے مستقل مندوب ڈینی ڈینن نے اپنی کارروائی کا دفاع کرتے ہوئے اسے “قومی بقا” کا اقدام قرار دیا۔ انہوں نے سلامتی کونسل میں تہران میں نصب اُس کاؤنٹ ڈاؤن گھڑی کی تصویر بھی دکھائی، جسے اسرائیل کی تباہی کے منصوبے کی علامت کہا جا رہا ہے۔
اقوام متحدہ کی انڈر سیکریٹری برائے سیاسی امور، روزمیری ڈی کارلو نے بتایا کہ سلامتی کونسل کا یہ ہنگامی اجلاس ایران کی درخواست پر بلایا گیا، جو اس معاملے کی نزاکت اور سنجیدگی کو واضح کرتا ہے۔