نئی دہلی: سپریم کورٹ نے بدھ (10 اپریل 2024) کو ادویات کے گمراہ کن اشتہار کے معاملے میں بابا رام دیو اور آچاریہ بال کرشنا کے خلاف توہین عدالت کی درخواست کی سماعت کی۔ سماعت کے دوران دونوں نے غیر مشروط معافی مانگ لی۔ تاہم عدالت نے بابا رام دیو کی طرف سے دیے گئے حلف نامہ کو ماننے سے انکار کر دیا۔ سماعت کے دوران جسٹس ہیما کوہلی نے کہا کہ ‘یہ حلف نامہ ہمارے سامنے آنے سے پہلے میڈیا میں شائع ہوا، کیا یہ پبلسٹی کے لیے دائر کیا گیا تھا یا ہمارے لیے؟’
‘عدالت سے جھوٹ بولا گیا’: سپریم کورٹ
رام دیو اور بال کرشنا کے وکیل مکل روہتگی نے عدالت کو بتایا، “ہم نے حلف نامہ 6 اپریل کو ہی داخل کیا تھا، شاید رجسٹری نے اسے ججوں کے سامنے نہیں رکھا تھا۔” اس کے بعد روہتگی نے حلف نامہ کا کچھ حصہ پڑھ کر سنایا، جس میں بابا رام دیو اور آچاریہ بال کرشنا کی جانب سے معافی مانگی گئی ہے۔ جج نے بیان حلفی پر اعتراض ظاہر کیا۔ اس میں رام دیو نے ملک سے باہر جانے کے اپنے پلان کی جانکاری دی ہے۔
یہ دیکھ کر ججوں نے کہا کہ اس طرح پورے عمل کو ہلکا لیا گیا ہے۔
مکل روہتگی نے سماعت ملتوی کرنے کی درخواست کی۔
سماعت کے دوران جسٹس امان اللہ نے کہا کہ عدالت سے جھوٹ بولا گیا۔ اس کے بعد جسٹس ہیما کوہلی نے کہا کہ ہم اس حلف نامے کو ماننے سے انکار کرتے ہیں۔ روہتگی نے سماعت ملتوی کرنے کی درخواست کی تاکہ یہ دیکھا جا سکے کہ رام دیو اور بال کرشن کو اور کیا لکھنے کی ضرورت ہے۔ اس پر جسٹس کوہلی نے کہا کہ ہم کتنی بار وقت دیں؟ جب اتراکھنڈ حکومت نے آپ سے معاملہ سپریم کورٹ میں آنے سے پہلے اشتہار روکنے کو کہا تو آپ نے انہیں یہ بھی کہا کہ قانونی طور پر آپ کے خلاف کوئی کارروائی نہیں کی جا سکتی۔ کیا آپ کو قانون کا علم نہیں تھا؟
اتراکھنڈ حکومت
کی بھی سرزنش کی
سپریم کورٹ نے کیس کی سماعت کے دوران اتراکھنڈ حکومت کو بھی سخت سرزنش کی۔ ججوں نے کہا کہ مرکزی حکومت نے یہ کیس 2020 میں اتراکھنڈ حکومت کو بھیج دیا تھا، لیکن اتراکھنڈ حکام نے اس معاملے میں بے عملی کا مظاہرہ کیا۔ اب ان افسران کے خلاف بھی کارروائی ہونی چاہیے جنہوں نے اس معاملے میں کوئی کارروائی نہیں کی۔ سماعت کے دوران عدالت نے ڈرگ لائسنسنگ اتھارٹی آف اتراکھنڈ کے جوائنٹ ڈائریکٹر کو بھی سخت سرزنش کی۔ عدالت نے عدالت میں موجود افسر سے استفسار کیا کہ آپ نے اب تک ان کے خلاف مقدمہ درج کیوں نہیں کیا؟ یہ کیوں نہ سمجھا جائے کہ آپ ان کے ساتھ ملی بھگت میں ہیں۔ موجودہ جوائنٹ ڈائریکٹر 9 ماہ سے اس عہدے پر ہیں۔ عدالت نے اس عہدے پر فائز افسر سے بھی کہا ہے کہ وہ حلف نامہ داخل کریں اور اگلی سماعت پر ذاتی طور پر حاضر ہوں۔
وکیل کی معافی قبول کرنے کی اپیل
ججوں کے سامنے بحث کرتے ہوئے رام دیو اور بال کرشنا کے وکیل نے کہا کہ انہوں نے معافی مانگ لی ہے۔ اسے قبول کیا جائے۔ اب جب افسران سے پوچھ گچھ ہو رہی ہے۔ ان کی طرف سے ضرور کوئی نہ کوئی کارروائی کی جائے گی۔ سالیسٹر جنرل تشار مہتا نے پوچھا کہ کیا انہوں نے وکلاء کو معافی نامہ میں لکھی گئی چیزوں کے بارے میں مشورہ دیا تھا۔ کیا اس میں کچھ کمی ہے؟ رام دیو اور بال کرشنا کے وکیل نے بھی یہی سوال کیا۔ اس پر جج نے کہا کہ ہم آپ کے مشورے میں کوتاہیوں کی نشاندہی نہیں کر رہے بلکہ پورے کیس کو حقائق کی بنیاد پر دیکھ رہے ہیں۔