بھارت-بنگلہ دیش کشیدگی کے درمیان یونس کی میٹھی سفارت کاری
زاکر حسین / ڈھاکہ:
بھارت اور بنگلہ دیش کے درمیان کشیدہ سفارتی تعلقات کے درمیان، بنگلہ دیش کے عبوری چیف ایڈوائزر محمد یونس نے بھارتی وزیرِ اعظم نریندر مودی کو 1,000 کلوگرام حری بھنگا آم بطور تحفہ بھیج کر دو طرفہ تعلقات میں نرمی لانے کی ایک علامتی کوشش کی ہے۔
اگرچہ “آم سفارت کاری” برصغیر کی ایک قدیم اور منفرد روایت رہی ہے، مگر یہ تازہ اقدام اگست 2024 میں وزیرِ اعظم شیخ حسینہ کی اقتدار سے برطرفی کے بعد پیدا ہونے والے تناؤ کے پس منظر میں خاص اہمیت رکھتا ہے۔
یہ آموں کا تحفہ صرف مودی تک محدود نہیں رہا بلکہ مغربی بنگال کی وزیرِ اعلیٰ ممتا بنرجی اور تریپورہ کے وزیرِ اعلیٰ مانک ساہا کو بھی بھیجا گیا ہے۔
حری بھنگا بنگلہ دیش کے شمالی علاقے رنگپور کا مشہور آم ہے، جو گول شکل، رسیلے گودے اور خوشبودار ذائقے کی وجہ سے جانا جاتا ہے۔ عام طور پر ہر آم کا وزن 200 سے 400 گرام تک ہوتا ہے، جبکہ بعض پھل 700 گرام تک بھی پہنچ جاتے ہیں۔ یاد رہے کہ سال 2021 میں شیخ حسینہ نے بھی 2,600 کلوگرام حری بھنگا آم بھارت بھیجے تھے، جسے اُس وقت ‘مٹھاس بھرا پیغام’ کہا گیا۔
شیخ حسینہ کی حکومت 2024 میں ایک طالبعلموں کی تحریک کے ذریعے برطرف کر دی گئی تھی، جس کے بعد سیاسی خلا پیدا ہوا اور محمد یونس کی قیادت میں عبوری حکومت قائم ہوئی۔ اس دوران حسینہ کو بھارت میں پناہ لینا پڑی جبکہ بنگلہ دیش کی انٹرنیشنل کرائمز ٹریبونل نے ان کی حوالگی کا مطالبہ کیا، جس سے دونوں ملکوں کے تعلقات مزید بگڑ گئے۔
بھارت نے بنگلہ دیش میں اقلیتوں پر بڑھتے ہوئے حملوں اور انتہا پسند عناصر کے عروج پر تشویش کا اظہار کیا۔
اگرچہ یونس ابتدائی طور پر بھارت کے ناقد سمجھے جا رہے تھے، لیکن مارچ 2025 میں انہوں نے برطانوی میڈیا کو ایک انٹرویو میں کہا:
“بھارت اور بنگلہ دیش کے تعلقات اچھے ہوئے بغیر رہ ہی نہیں سکتے۔”
انہوں نے مشترکہ تاریخ اور اقتصادی انحصار پر زور دیتے ہوئے کہا:
“ہمارے رشتے بہت قریبی ہیں… ہم اس سے انحراف نہیں کر سکتے۔”
یونس اور مودی کے درمیان پہلی سرکاری ملاقات اپریل میں بینکاک میں BIMSTEC سمٹ کے دوران ہوئی، جہاں وزیرِ اعظم مودی نے بنگلہ دیش میں جمہوری، مستحکم، پرامن اور جامع ترقی کی حمایت کا اعادہ کیا، ساتھ ہی اقلیتوں کے تحفظ اور جمہوری بحالی پر زور دیا۔
یونس نے ابتدائی طور پر انتخابات مؤخر کرنے کی بات کی تھی، تاہم انہوں نے حال ہی میں اعلان کیا ہے کہ بنگلہ دیش میں آئندہ عام انتخابات اپریل 2026 کے پہلے نصف میں ہوں گے۔
اسی دوران ایک نیا طالبعلموں پر مبنی سیاسی اتحاد، نیشنل سٹیزن پارٹی (NCP) بھی ابھرا ہے، جس نے بنگلہ دیش کی سیاست کو مزید پیچیدہ بنا دیا ہے۔
شیخ حسینہ کی حکومت نے بھارت کے ساتھ قریبی تعلقات قائم رکھے تھے، اور آم و ہلسا مچھلی جیسے تحائف کے ذریعے دوستانہ سفارت کاری کو فروغ دیا تھا۔ تاہم یونس کی عبوری حکومت نے کچھ عرصے کے لیے چین اور پاکستان کی طرف جھکاؤ دکھایا، جس سے بھارت میں تشویش پیدا ہوئی۔
چین کا جنوبی ایشیا میں بڑھتا ہوا اثر و رسوخ — قرضوں، ہتھیاروں کے معاہدوں، اور انفراسٹرکچر سرمایہ کاری کے ذریعے — بھارت کی حکمتِ عملی کے لیے ایک چیلنج بنتا جا رہا ہے۔
ایسے میں یونس کی جانب سے آم بھیجنا دو طرفہ تعلقات میں “نرم آغاز” کے طور پر دیکھا جا رہا ہے۔ لیکن یہ سوال باقی ہے کہ کیا آم کی مٹھاس سفارتی کڑواہٹ کو کم کر سکے گی؟
جیسا کہ ایک تجزیہ کار نے طنزیہ انداز میں کہا:
“کیا مٹھاس وہاں کامیاب ہو سکتی ہے، جہاں حکمتِ عملی ناکام ہو جائے؟“