نئی دہلی
اردو صحافت کے عظیم سپوت محمد مسلم (1920–1986) کی حیات و خدمات پر طویل انتظار کے بعد کتاب ’’محمد مسلم۔۔ عظیم انسان، بیباک صحافی‘‘ شائع ہوگئی ہے۔ اس کتاب کو صحافی جاوید اختر نے مرتب کیا ہے۔ یہ تقریباً چار دہائیوں بعد پہلی مرتبہ ایک ایسی جامع کاوش ہے جس میں مسلم صاحب کی تحریروں کے ساتھ ساتھ 40 سے زائد ممتاز شخصیات کی یادیں اور تاثرات بھی یکجا کیے گئے ہیں۔
320 صفحات پر مشتمل یہ کتاب ایم ایم آئی پبلیکیشنز، نئی دہلی سے شائع ہوئی ہے۔ قیمت 350 روپے ہے اور یہ جلد ہی فلپ کارٹ اور ایمیزون پر بھی دستیاب ہوگی۔ اس میں مسلم صاحب کے اداریے، مضامین اور تحریروں کے ساتھ متعدد اہلِ علم و قلم کی آراء شامل ہیں۔
محمد مسلم آزادی کے بعد کے اُن معدودے چند اردو صحافیوں میں شمار ہوتے ہیں جنہوں نے حق گوئی، اصول پسندی اور وقارِ قلم کو اپنی پہچان بنایا۔ ان کے مداح انہیں اکثر علامہ اقبال کے تصور ’’مردِ مومن‘‘ کا عملی پیکر قرار دیتے ہیں۔
بھارت کے سابق وزیر اعظم آئی کے گجرال نے کہا تھا:
“مسلم صاحب سے پہلی ملاقات ہی میں ان کی ذہانت، حاضر جوابی اور بے ساختہ سادگی نے مجھے بے حد متاثر کیا۔”
سینئر صحافی کلدیپ نیر نے لکھا:
“آج کے دور میں جب صحافت میں اصول پسندی کا فقدان ہے، میں مسلم صاحب کو شدت سے یاد کرتا ہوں۔ وہ محض اصول کے حامی نہیں تھے بلکہ خود ایک اصول تھے۔”
علی گڑھ مسلم یونیورسٹی کے سابق وائس چانسلر سید حمید کے مطابق:
“ان کی نثر متوازن، فکر انگیز اور ہمدردی سے لبریز تھی، جس میں سطحیت کی کوئی جگہ نہ تھی۔”
کشمیری رہنما سید علی شاہ گیلانی نے کہا:
“جب بھی جموں و کشمیر کے مسلمانوں کے مسائل پر گفتگو ہوتی تو مسلم صاحب کی آنکھیں نم ہوجاتیں اور چہرہ غم کی تصویر بن جاتا۔”
سابق سفارتکار و دانشور سید شاہاب الدین نے لکھا:
“جب ہندوستانی مسلمانوں کی تاریخ لکھی جائے گی تو مسلم صاحب کا ذکر سنہری حروف میں ہوگا۔ وہ ایسے مدبر رہنما تھے جنہوں نے بغیر صلے یا شہرت کی تمنا کے امت کی خدمت کی۔”
کتاب کے دیباچے میں سید سادات اللہ حسینی (امیر جماعت اسلامی ہند) نے کہا:
“یہ مجموعہ صحافیوں، رہنماؤں اور سماجی کارکنوں سب کے لیے یکساں مفید ہے۔ مسلم صاحب کی زندگی کے کئی پہلو آج بھی ہماری رہنمائی کرتے ہیں۔”
کتاب کے مرتب جاوید اختر نے کہا کہ اس کا مقصد نئی نسل تک محمد مسلم کی بےباک صحافت اور اصولوں پر مبنی زندگی کا پیغام پہنچانا ہے۔
کتاب ایشیا ٹائمز پبلیکیشنز نے شائع کی ہے اور ایم ایم آئی پبلیکیشنز سے خریدی جاسکتی ہے
رابطہ برائے خریداری:
📞 7290092405 (ایم ایم آئی پبلیکیشنز، نئی دہلی)
📞 9818504272 (جاوید اختر)