AMN
دنیا بھر میں لڑکیوں اور خواتین کے ختنے کیے جانے کے عمل میں تشویشناک اضافہ ہوا ہے جو عالمی برداری میں پریشانی کا باعث مانا جا رہا ہے –
اقوام متحدہ کی ايک تازہ رپورٹ میں کہا گیا ہے کہ دنیا بھر میں دو سو ملین سے زائد لڑکیوں اور خواتین کے ختنے کیے جاتے ہیں۔ یہ اعداد و شمار اس سے پہلے لگائے جانے والے اندازوں سے کہیں زیادہ ہيں۔
اقوام متحدہ نے اپنی ایک تازہ رپورٹ میں کہا ہے کہ دنیا بھر میں لڑکیوں اور خواتین کے ختنے کیے جانے کے عمل میں اضافہ ہوا ہے اور اس عمل کو روکنے کے لیے فوری اقدامات کی ضرورت ہے۔
نسوانی ختنوں کے خلاف عالمی دن کے موقع پر اس عالمی ادارے نے خبردار کیا ہے کہ عالمی کوششوں کے باوجود کچھ ممالک میں یہ عمل فروغ پا رہا ہے۔ نسوانی ختنے یا ’فیمیل جینیٹل میوٹیلیشن FGM کے عمل میں لڑکیوں یا خواتین کی اندام نہانی کے بیرونی حصے کو مکمل یا جزوی طور پر کاٹ کر الگ کردیا جاتا ہے۔
خواتین یا لڑکیوں کے جنسی اعضاء کو ایسے بہیمانہ طریقے سے کاٹ دینے کی فرسودہ روایت زیادہ تر افریقی ممالک میں اب بھی رائج ہے۔ اقوام متحدہ نے اس عمل کو انسانی حقوق کی پامالی قرار دیتے ہوئے کہا ہے کہ اگر موجودہ روایات برقرار رہیں تو آئندہ پندرہ برسوں کے دوران نسوانی ختنوں کا شکار بننے والی خواتین کی تعداد غیر معمولی طور پر بڑھ جائے گی۔
اقوام متحدہ کے عالمی ادارہ اطفال نے یہ رپورٹ ’زیرو ٹالرنس فار فیمیل جینیٹل میوٹیلیشن‘ کے دن کی مناسبت سے جاری کی ہے۔ یونیسف نے اس رپورٹ کی تیاری کی خاطر تیس ممالک سے اعداد و شمار جمع کیے لیکن اس رپورٹ کے مطابق نسوانی ختنوں کا شکار بننے والی نصف خواتین کا تعلق مصر، ایتھوپیا اور انڈونیشیا سے تھا۔
یونیسف کی نائب ایگزیکٹیو ڈائریکٹر گیتا راؤ گپتا کا کہنا ہے کہ مختلف خطوں اور ثقافتوں میں نسوانی ختنہ کرنے کے طریقہ کار مختلف ہیں لیکن اس کی کچھ اقسام سے خواتین کو سنجیدہ طبی مسائل بھی لاحق ہو سکتے ہیں، ’’نسوانی ختنے کی ہر قسم بچیوں اور خواتین کے حقوق کی پامالی کا باعث ہے۔ ہم سب کو مل کر اس کے سدباب کے لیے کام کرنا چاہیے۔‘‘
خواتین یا لڑکیوں کے جنسی اعضاء کو ایسے بہیمانہ طریقے سے کاٹ دینے کی فرسودہ روایت زیادہ تر افریقی ممالک میں اب بھی رائج ہے
افریقی ملک صومالیہ میں نسوانی ختنوں کی روایت بہت زیادہ پائی جاتی ہے، جہاں ایک محتاط اندازے کے مطابق پندرہ تا انچاس برس کی خواتین کی اٹھانوے فیصد تعداد اس عمل کا شکار ہے۔ اسی طرح گنی، جبوتی اور سیرا لیون میں بھی بہت زیادہ خواتین کے ختنے کیے جاتے ہیں۔
اس بہیمانہ عمل کی حمایت کرنے والی کمیونٹیوں میں نسوانی ختنہ شادی کرنے کی ایک اہم شرط تصور کیا جاتا ہے۔ بہت سے افراد اسے مذہبی ذمہ داری بھی تصور کرتے ہیں لیکن ابراہیمی مذاہب میں نسوانی ختنوں کا کہیں کوئی تذکرہ نہیں ملتا ہے۔
امریکا میں نسوانی ختنے کے خطرات میں دوگنا اضافہ ہوا ہے
امریکا میں 1996ء میں اس رسم پر پابندی عائد کر دی گئی تھی اور 2012 ء میں ایک قانون پاس کیا گیا تھا جس کے تحت کسی لڑکی کو نسوانی ختنے کی غرض سے امریکا سے باہر لے جانے کےعمل کو غیر قانونی قرار دے دیا گیا تھا۔
جمعرات کو نیو یارک اور ٹیکساس میں امریکی نمائندوں نے’ زیرو ٹالرنس فار فیمیل جینیٹل میوٹیلیشن‘ FGM ایکٹ 2015 ء متعارف کروایا جس کے تحت وفاقی حکومت پر زور دیا گیا ہے کہ وہ اس جیسا قانون ملکی سطح پر نافذ کرے تاکہ اس بہیمانہ عمل کے خطرات کی شکار لڑکیوں اور خواتین کو تحفظ فراہم کیا جا سکے۔
