’کوہِ نور پر مودی حکومت کا کنفوزن
عندلیب اختر
ملک میں موجود کی اہم مسائل کو ھل کرنے میں ناکام مودی حکومت اب ’کوہِ نور کو برطانیہ سے ہندوستان لانے کے معاملے میں بھی شدید کنفوزن کا شکار نظر آ رہی ہے – یہی وجہ ہے کے گھڑی گھڑی اس معاملے حکومت اپنا نظریہ تبدیل کر رہی ہے – مرکزی حکومت نے ١٩ اپریل کو ایک بیان میں کہا ہے کہ حکومت کوہ نور ہیرے کو ملک واپس لانے کے لیے پرعزم ہے۔
یہ بیان ایسے وقت آیا ہے جب اس سے ایک روز قبل ہی حکومت کی جانب سے سالیسٹر جنرل رنجیت کمار نے سپریم کورٹ کو بتایا کہ یہ ہیرا برطانیہ کو سکھ جنگوں کے بعد تحفہ دیا گیا تھا، اسے چرایا نہیں گیا تھا۔ ان کے مطابق یہ وزارت ثقافت کا موقف ہے اور وزارت خارجہ نے ابھی اپنا نظریہ واضح نہیں کیا۔
تاہم ١٩ اپرال کو وزارت ثقافت کے وزیر کی جانب سے ایک بیان میں کہا گیا ہے کہ ’حکومت ایک بار پھر اس عزم کا اعادہ کرتی ہے کہ کوہ نور ہیرے کو ملک میں واپس لانے کی بھرپور کوشش کرے گی۔
بیان میں کہا گیا ہے کہ سالیسٹر جنرل رنجیت کمار کا بیان حکومت کا موقف نہیں ہے اور سپریم کورٹ میں سرکاری موقف ابھی پیش نہیں کیا گیا۔
واضح ہو کے سالیسٹر جنرل رنجیت کمار کا کہنا تھا کہ پنجاب کے راجہ نے کوہ نور ہیرا برطانوی حکومت کو اپنی مرضی سے دیا تھا اور اسے چُرا کر نہیں لے جایا گیا تھا۔
سپریم کورٹ ایک غیر سرکاری ادارے کی دائرکردہ پٹیشن کی سماعت کر رہی ہے جس میں درخواست کی گئی ہے کہ عدالت حکومت کو کوہ نور واپس لانے کی ہدایت دے۔
حکومت کے موقف کے برعکس ایک نظریہ یہ ہے کہ برطانوی حکومت نےسکھوں کے خلاف جنگ جیتنے کے بعد راجہ رنجیت سنگھ کے نابالغ جانشین دلیپ سنگھ سے یہ ہیرا حاصل کیا تھا۔
عدالت نے اس سلسلے میں حکومت کو ایک حلف نامہ داخل کرنے کی ہدایت دی ہے۔ عدالت کا کہنا ہے کہ حکومت اگر اپنے موقف پر قائم رہتی ہے تو اس کے لیے مستقبل میں کوہ نور کو واپس لانے کے راستے بند ہو جائیں گے۔
فی الحال یہ ہیرا برطانیہ کی ملکہ الزبتھ کی ملکیت ہے اور ملکہ کے تاج میں جڑا ہوا ہے۔ خیال کیا جاتا ہے کہ 105 قیراط کا یہ ہیرا کبھی دنیا کا سب سے بڑا ہیرا تھا، لیکن بعد میں اسے تراش کر چھوٹا کر دیا گیا تھا۔
حکومت کے مطابق راجہ رنجیت سنگھ نے 1850 میں یہ ہیرا سامراجی حکومت کو تحفے کے طور پر پیش کیا تھا۔
مورخین کے مطابق کوہ نور معاہدہ لاہور کے بعد برطانوی تحویل میں پہنچا تھا۔ یہ معاہدہ ان جنگوں کے بعد طے پایا تھا جن کے نتیجے میں پنجاب برطانیہ کے کنٹرول میں آگیا تھا۔
وہِ نور کو آج کل ’ٹاور آف لندن‘ میں نمائش کے لیے رکھا گیا ہے۔ اسے موجودہ ملکہ الزبتھ کی والدہ نے، جن کا نام بھی الزبتھ ہی تھا، سن 1937ء میں اپنے شوہر جارج ششم کی تاج پوشی کے موقع پر پہنا تھا جبکہ بعد ازاں اسے 2002ء میں اُن (الزبتھ) کے تابوت پر بھی رکھا گیا تھا۔
واضح رہے کہ سن 2010ء میں برطانوی وزیر اعظم ڈیوڈ کیمرون نے اپنےدورہٴ بھارت کے موقع پر یہ کہا تھا کہ یہ ہیرا لندن ہی میں رہے گا۔ تب اُنہوں نے کہا تھا: ’’اس طرح کے سوالات کے سلسلے میں عموماً ہوتا یہ ہے کہ جب آپ ایک چیز کے جواب میں ہاں کہتے ہیں تو آپ اچانک دیکھیں گے کہ پورا برٹش میوزیم ہی خالی ہو گیا ہے۔‘‘
سپریم کورٹ میں یہ درخواست ایک شہری نفیس احمد صدیقی کی طرف سے دائر کی گئی تھی، جس میں بہت سے دیگر بھارتی شہریوں کے نقطہٴ نظر کی تائید کرتے ہوئے یہ موقف اختیار کیا گیا تھا کہ کوہِ نور اُن بہت سے نوادرات میں سے ایک ہے، جو برطانوی حکمران اپنے نو آبادیاتی دور کے دوران یہاں سے اپنے ساتھ لے گئے تھے۔
