عراق میں ہونے والے دو خودکش حملوں میں31 ہلاک

عراقی دارالحکومت بغداد اور اس کے نواح میں ہونے والے دو خودکش دھماکوں کے نتیجے میں ہلاکتوں کی تعداد بڑھ کر 31 ہو گئی ہے۔ حکام کے مطابق ان دھماکوں میں درجنوں دیگر افراد زخمی بھی ہیں۔ ان دونوں حملوں کی ذمے داری دہشت گرد تنظیم ’اسلامک اسٹیٹ‘ نے قبول کر لی ہے۔ پولیس کے مطابق بغداد کے زیادہ تر شیعہ آبادی والے علاقے ’نیو بغداد‘ میں ہونے والے خودکش حملے میں 19 سویلین ہلاک جبکہ 46 دیگر زخمی ہوئے۔ دوسرا حملہ بغداد کے شمالی نواحی علاقے میں ہوا، جب خودکش حملہ آور نے دھماکہ خیز مواد سے بھری ایک گاڑی ایک فوجی چیک پوسٹ سے ٹکرا دی۔ اس حملے میں سات شہریوں اور پانچ فوجی اہلکاروں سمیت بارہ افراد ہلاک اور کم از کم بتیس زخمی ہو گئے۔